Он цагийн товчоон

      Тус сургууль нь “Эрдэнэт үйлдвэр” ТӨҮГ болон уул уурхайн бусад томоохон компаниудын нарийн мэргэжлийн ажилчид, инженер техникийн ажилтнуудыг шинээр сургах, мэргэжил дээшлүүлэх, хос мэргэжил олгох сургалтуудыг явуулж, Монгол улсын уул уурхайн салбарын боловсон хүчин бэлтгэхэд түүхэн үүрэг гүйцэтгэж ирсэн юм.

      Уул уурхайн чиглэлээр дээд боловсролтой мэргэжилтэн, мэргэжлийн ажилчид бэлтгэх, тэдний мэргэжлийг дээшлүүлэх, эх орны уул уурхайн үйлдвэрлэл болон Эрдэнэт үйлдвэр ХХК-ийн техник, технологийг боловсронгуй болгох чиглэлээр эрдэм шинжилгээ, зураг төсөл, хагас үйлдвэрлэлийн туршилтын ажил эрхэлж, “Сургалт + Эрдэм шинжилгээ + Үйлдвэрлэл”-ийн цогцолбор үйл ажиллагаагаа явуулж байна.

1975 он:

  • Монгол-Зөвлөлтийн Засгийн газар хоорондын Эдийн засаг, шинжлэх ухаан, техникийн хамтын ажиллагааны комиссын 1975 оны 4-р сарын 12-ны өдрийн хуралдаан болон хамтарсан Эрдэнэт үйлдвэрийн Зөвлөлийн 2-р хурлын шийдвэрийн дагуу Эрдэнэт үйлдвэрийн Ерөнхий захирлын 1975 оны 9-р сарын 13-ны өдрийн 63 тоот тушаалаар уул уурхайн нарийн мэргэжлийн ажилчид бэлтгэх “Сургалтын төв”-ийг байгуулагдсан.
  • 1975 оны 10 сарын 1-нд Сургалтын төв нь захирал, 2 багш, аж ахуйн нярав, үйлчлэгч, жижүүр гэсэн 7 орон тоо, 41 сурагчтайгаар үйл ажиллагаагаа эхлүүлсэн.

1977 он:

  • 1977 оны 9 сарын 1-нд Техник мэргэжлийн сургуулийн иж бүрэн цогцолбор “Сургалтын төв” ашиглалтад орсон байна.

1979 он:

  • Эрдэнэт үйлдвэрийн Ерөнхий захирлын 1979 оны 10 сарын 22-ны өдрийн 203 тоот тушаал гарч, “Сургалтын төв”- д уул уурхайн техникумийн оройн салбар байгуулагдсан.

1993 он:

  • Эрдэнэт үйлдвэрийн Ерөнхий захиралын 1993 оны 4 сарын 8-ны өдрийн 156 дугаар тушаалаар "Сургалт курсийн комбинат" гэж өөрчлөн байгуулсан.

1996 он:

  • Монгол улсын Техникийн их сургуулийн Реакторын болон Эрдэнэт үйлдвэрийн Ерөнхий захирлын 1996 оны 10 сарын 19-ний өдрийн 455 тоот тушаал гарч Сургалт курсийн комбинатыг “Шаталсан сургалттай техникийн сургууль” болгон өөрчлөн зохион байгуулсан.

1998 он:

  • Монгол улсын Гэгээрлийн Сайдын 1998 оны 12-р сарын 11-ний өдрийн 274 тоот тушаалаар Эрдэнэт үйлдвэрийн дэргэдэх, ТИС-ийн харьяа Технологийн сургууль болгон өргөжүүлсэн.

2001 он:

  • Монгол улсын Засгийн газрын 2001 оны 6 сарын 20-ны өдрийн шийдвэрээр Технологийн сургуулийг Монгол улсын хөдөлмөрийн баатар, Техникийн шинжлэх ухааны доктор Шагдарын Отгонбилэгийн нэрэмжит сургууль болгож, гэрэлт хөшөөг нь сургуулийн дэргэд босгосон.

2003 он:

  • Монгол улсын боловсролын асуудал эрхэлсэн төрийн төв байгууллага Гэгээрлийн яамнаас Улсын бүртгэлийн гэрчилгээ, Монгол улсын дээд боловсролын магадлан итгэмжлэлийн үндэсний зөвлөлөөс анх удаа Дээд боловсролын магадлан итгэмжлэлийн гэрчилгээ тус тус олгосон.

2009 он:

  • Монгол улсын дээд боловсролын магадлан итгэмжлэлийн үндэсний зөвлөлөөс хоёр дахь удаагаа 10 жилийн хугацаатай магадлан итгэмжлэгдсэн.

2010 он:

  • “Оюу Толгой” ХХК-ийн анхны 465 мэргэжлийн ажилтан бэлтгэсэн.

2013 он:

  • Тус сургуулийг 2014-2024 онд хөгжүүлэх мастер төлөвлөгөөг боловсруулж батлан гаргав.
  • 2013-2014 оны хичээлийн жилийн төгсөлтөөс эхлэн тус сургуулийг Онцлох дипломтой төгссөн төгсөгчдөд Эрдэнэт үйлдвэрт ажиллах эрхийн “БАТЛАМЖ” гардуулдаг болов.

2016 он:

  • “Цахилгааны инженер” бакалаврын эчнээ хөтөлбөрт анхны элсэлт авсан.
  • Тус сургуулийн нэрэмжит “Математик-байгалийн ухааны хичээлийн бүсийн олимпиад”-ыг ЕБС-ийн сурагчдын дунд анх удаа зохион байгуулав.

2017 он:

  • Чанарын менежментийн тогтолцоо-ISO 9001 стандартыг нэвтрүүлж эхлүүлсэн.

2018 он:

  • Чанарын менежментийн тогтолцоо MNS ISO9001:2016 стандартыг амжилттай хэрэгжүүлж гэрчилгээ гардан авсан.

2019 он:

  • Монгол улсын дээд боловсролын магадлан итгэмжлэлийн үндэсний зөвлөлөөс гурав дахь удаагаа 5 жилийн хугацаатай магадлан итгэмжлэгдсэн.

2020 он:

  • БСШУ-ны сайдын 2020 оны 01 сарын 16-ны өдрийн А/30 дугаар тушаалаар "Эрдэнэт цогцолбор" дээд сургууль болгон өргөжүүлсэн.